1. ბიუროზე დარეგისტრირდა საგზაო მოძრაობის შესახებ და თანმდევ კანონებში ცვლილებების შეტანის შესახებ მთავრობის ინიციატივა.

საგზაო მოძრაობის შესახებ კანონში ცვლილებების თანახმად:

• პერიოდული ტექნიკური ინსპექტირება განისაზღვრება შემდეგნაირად: ტექნიკური ოპერაციებისა და პროცედურების ერთობლიობა, რომლის მეშვეობითაც დაწესებული პერიოდულობით დგინდება ავტოსატრანსპორტო საშუალების მოძრაობის უსაფრთხოების ძირითადი ელემენტების ტექნიკური მდგომარეობა და ატმოსფერულ ჰაერში გაფრქვეულ გამონაბოლქვში მავნე ნივთიერებათა შემადგენლობა.
• საქართველოს ტერიტორიაზე ექსპლუატაციაში არსებული და დადგ. წესით რეგისტრირებული ავტოსატრანსპორტო საშუალება ექვემდებარება პერიოდულ ტექნიკურ ინსპექტირებას სსიპ აკრედიტაციის ერთიანი ეროვნული ორგანოს – აკრედიტაციის ცენტრის მიერ შესაბამის სფეროში აკრედიტებულ ინსპექტირების ცენტრებში.
• ავტოსატრანსპორტო საშუალების პერიოდული ტექნიკური ინსპექტირების ცენტრების შენობა-ნაგებობების, აღჭურვილობის და პერსონალის ტექნიკური კვალიფიკაციის მიმართ მოთხოვნები უნდა განისაზღვროს საქართველოს მთავრობის ნორმატიული აქტით
• ის ავტოსატრანსპორტო საშუალებები, რომლებსაც გზისთვის ვარგისობაზე ტესტირება, კანონმდებლობით დადგენილი წესით, ჩაუტარდათ 2018 წლის 1 იანვრამდე, არ საჭიროებენ პერიოდულ ტექნიკურ ინსპექტირებას ჩატარებული ავტოსატრანსპორტო საშუალების ტესტირების დარჩენილი პერიოდის ამოწურვამდე

ცვლილებები ადმინისტრაციულ სამართალდარღვევათა კოდექსში:

• იმ ავტოსატრანსპორტო საშუალების მართვა, რომელსაც არ გაუვლია პერიოდული ტექნიკური ინსპექტირება დადგენილი წესით გამოიწვევს მძღოლის დაჯარიმებას 50ლარის ოდენობით.
• ისეთი ავტოსატრანსპორტო საშუალების სამართავად/საექსპლუატაციოდ გადაცემა/დაშვება, რომელსაც არ გაუვლია პერიოდული ტექნიკური ინსპექტირება დადგენილი წესით გამოიწვევს ფიზიკური პირის დაჯარიმებას 50 ლარის ოდენობით, ხოლო იურიდიული პირის ან/და ინდივიდუალური მეწარმის დაჯარიმებას 200 ლარის ოდენობით
• მითითებულ სამართალდარღვევისთვის პირს პასუხისმგებლობა დაეკისრება სამართალდარღვევის ფაქტის ვიდეოფირზე ან/და ფოტოფირზე დაფიქსირებისას, თუ შინაგან საქმეთა სამინისტროს უფლებამოსილი პირი სამართალდარღვევის ფაქტზე შემთხვევის ადგილზე არ გამოწერს საჯარიმო ქვითარს

კანონპროექტი იხ. აქ: https://info.parliament.ge/#law-drafting/14661

2. ბიუროზე დარეგისტრირდა გარემოს დაცვისა და ბუნებრივი რესურსების კომიტეტის ინიციატივა ადმინისტრაციულ სამართალდარღვევათა კოდექსში ცვლილების შეტანის შესახებ, რომლის თანახმად:

• საქალაქო რეგულარული სამგზავრო გადაყვანის ავტობუსით ან სამარშრუტო ტაქსით (მიკროავტობუსით) უბილეთოდ მგზავრობა გამოიწვევს დაჯარიმებას 20 ლარის ოდენობით (მოქმედი რეგულაციით 5 ლარი)
• ემატება მითითება იმის შესახებ, რომ მგზავრმა მგზავრობის დასაწყისიდანვე შეიძინოს ბილეთი ან ელექტრონული გადახდის საშუალებით განახორციელოს მგზავრობის ტარიფით განსაზღვრული თანხის გადახდა
• საურავის ოდენობა განისაზღვრება დაკისრებული ჯარიმის ორმაგი ოდენობით (მოქმედი რეგულაციით 50 ლარი)

კანონპროექტი იხ. აქ: https://info.parliament.ge/#law-drafting/14654

3. ბიუროზე საკანონმდებლო ინიციატივად დარეგისტრირდა ეროვნული მარეგულირებელი კომისიის მიერ თავდაპირველად წარდგენილი საკანონმდებლო წინადადება (https://info.parliament.ge/#law-drafting/13554) მაუწყებლობის შესახებ და თანმდევ კანონებში ცვლილებების შეტანის თაობაზე, რომელიც მათ შორის გულისხმობს:

• მედია წიგნიერების საკანონმდებლო დეფინიციის განსაზღვრას
• კომისიის ფუნქციებს ემატება მედია წიგნიერების განვითარების ხელშეწყობის ფუნქცია, აღნიშნულის განხორციელების შესახებ უნდა იყოს აღნიშნული ასევე კომისიის ანგარიშში

კანონპროექტები იხ. აქ: https://info.parliament.ge/#law-drafting/14655